Ministria e Drejtësisë ka përgatitur një paketë projektligjesh që kërkojnë të rregullojnë marrëdhëniet dhe situatën në sistemin e burgjeve në vend.
Sipas versionit print të “Gazeta Shqiptare”, një prej projektligjeve të hartuar është edhe ai “Për Policinë e Burgjeve”, ku paralajmëron largime të punonjësve të saj,
Sipas këtij drafti bëhet fjalë për rifreskim të stafit të policisë, por dhe përcaktimin e kategorive të rekrutimit dhe të trajtimit më të mirë të tyre.
Kështu do të ketë largime të atyre punonjësve të policisë së Burgjeve që janë në moshën mbi 50 vjeç për faktin se nuk i përgjigjen kërkesave të punës. Në relacionin e projektligjit bëhet e ditur se “problematikat lidhen së pari me nivelin jo të kënaqshëm të performancës së punonjësve të burgjeve që lidhet me rekrutimin, trajtimin ekonomik e financiar, kualifikimin, promovimin dhe mbështetjen e tyre. Menaxhimi i deritanishëm nuk garanton balancë ndërmjet kërkesave për përmirësimin e shërbimit publik dhe respektimit të të drejtave të punonjësve”.
Gjithashtu në relacion theksohet se: Procedurat aktuale dhe situata në të cilën ndodhen punonjësit e Policisë së Burgjeve ka sjellë vështirësi në rekrutimin e punonjësve cilësor dhe prezencën e një numri të konsiderueshëm të punonjësve me moshë mbi 55 vjeç, që që sjell vështirësi në kryerjen e detyrave që kanë lodhje fizike. Numri i punonjësve të policisë së burgjeve mbi 50 vjeç është 24.7 %.