Me anë të një letër-porosie, Prokuroria e Palermos ka sekuestruar një shumë prej afro 18 milionë eurosh, që i gjeti në një bankë të nivelit të dytë në Shqipëri.
Sekuestro e tyre, u bë pasi dyshohen se ato burojnë nga aktivitet kriminal.
Paratë ishin të depozituara në llogarinë bankare në emër të shtetasit italian Francesco Zummo, ndërsa i përfshirë figuron edhe biznesmeni i njohur shqiptar Rezart Taçi, i cili ndodhet aktualisht i shpallur në kërkim, si dhe dy bashkëpunëtorët e tij, Artur Balla dhe Bledar Lilo, të cilët janë të arrestuar.
Shuma dyshohet se është përftuar nga aktiviteti kriminal i mafias italiane.
Sipas autoriteteve, transferta e paligjshme e saj drejt Shqipërisë është bërë e mundur nga biznesmeni Rezart Taçi nëntorin e kaluar, edhe pse është në kërkim.
Po ashtu, nën hetim në Itali është marrë edhe shtetasi Francesco Zumo, një biznesmen 90-vjeçar nga Palermo i dyshuar për lidhje me mafian dhe Fabio Petruzzella, ekonomistin që transferoi paratë.
Prokuroria e posaçme akuzon Taçin dhe 2 personat e tjerë si të përfshirë në transfertën e paligjshme nga bankat zvicerane në një bankë të nivelit të dytë në Shqipëri.
Nga hetimet ka rezultuar se këta persona kundrejt parave do të kryenin këtë transfertë, ndërsa akuzohen për grup të strukturuar kriminal dhe pastrim parash.