Partia Socialiste është tërhequr nga propozimi për të ndryshuar rregulloren e Kuvendit, që detyronte Prokurorinë të paraqiste prova për autorizimin e arrestimit të deputetëve.
E propozuar disa kohë më parë nga kreu i grupit të PS, Taulant Balla, tashmë ajo është tërhequr sikurse njoftoi sot kreu i Komisionit të Ligjeve, Ulsi Manja. Gjatë mbledhjes së sotme të këtij komisioni, Manja argumentoi se PS ka bërë një hap pas për të shmangur debatin politik. Propozimi i PS-së synonte që në Rregulloren e Kuvendit të specifikohej që Prokuroria të japë prova në Këshillin e Mandateve kur kërkon heqje imuniteti për një deputet.
Kjo nismë e PS u shoqërua me debate të forta politike në atë kohë dhe u kundërshtua nga PD, pasi në rastin e kërkesës së Prokurorisë për të arrestuar ish-deputetin Saimir Tahiri, deputetët e PS kërkuan paraqitjen e provave dhe nuk e dhanë autorizimin për arrestimin e tij, edhe pse, deputetët nuk gëzojnë imunitet.