Drejtuesi politik i Qarkut Dibër Ulsi Manja gjatë Asamblesë së Partisë Socialiste Mat përcolli detyrat dhe porositë e fundit të Kryesisë së PS-së.
Manja tha gjatë mbledhjes, se në çdo organizatë partie duhet të zhvillohen mbledhjet për të analizuar me përgjegjësi rezultatin e zgjedhjeve të fundit si dhe të mundësohen pranime të reja, duke synuar përtëritjen e të gjithë strukturave.
Ai nënvizoi se është shumë e rëndësishme të punohet fort dhe dhe të nis përgatitja për zgjedhjet lokale, duke pasur si objektiv fitimin e 4 bashkive të këtij qarku, Dibrën, Matin, Bulqizën dhe Klosin.
“Të qeverisësh për disa mandate ka kosto, ka konsum. Pra, nuk duhet të flemë mbi dafina, nuk na falet të tolerojmë, të dorëzohemi. Ne jemi në qeverisjen qendrore dhe lokale për t’u shërbyer qytetarëve, pavarësisht bindjeve politike. Qytetarët e zakonshëm një herë në katër vjet e japin votën e tyre për ata që u kanë shërbyer”, theksoi Manja.
Po ashtu ai u ndal edhe tek puna dhe roli i drejtorëve rajonal dhe lokal.
“Gjatë analizave në strukturat e PS, do të vlerësohet puna e drejtorëve. Nuk do të tolerohet nepotizmi në administratë. Do të ketë vlerësim real për punën e çdo drejtori, performancën dhe aftësitë e tij.”, tha Manja.
Duke përfunduar fjalën e tij Ulsi Manja theksoi se për të arritur suksesin e dëshiruar ne socialistët duhet të kemi organizim perfekt, frymë të ngushtë bashkëpunimi dhe solidaritet.
Në këtë mbledhje merrnin pjesë edhe deputetja Aurora Mara, kryetari i bashkisë Mat Agron Malaj dhe kryetari i PS Hasan Pasha.