Presidenti i Rusisë, Vladimir Putin, raportohet se ka hyrë në paranoja e se po frikësohet se vdekja do t’i vijë si diktatorëve Muammar Gaddafi e Saddam Husseini. 70-vjeçari thuhet se ka mbetur krejt pa fjalë, kur pati parë videon e vdekjes së tiranit nga Libia, Gaddafi, kur qe gjymtuar më 2011.
Heshtja e tij e frikshme tashmë është duke u përfolur në komunitetin e inteligjencave perëndimore, siç shkruan “Daily Mirror”. Ky medium anglez po ashtu ka shkruar se Putini e ka shikuar në vazhdimësi videon tmerruese.
“Nuk pati thënë as edhe një fjalë, kur lajmi po transmetohej”, ka shkruar ky medium duke shtuar se “gjëja më e rëndësishme për Putinin është vetë pushteti, pasuria dhe mbijetesa e tij, e se rreziku për grusht shteti është ndër gjërat që e tmerron më së shumti”.
Putini raportohet se përdor edhe testues të ushqimit pasi ka hyrë në paranojë se mos po helmohet dhe se ka punësuar një grup të njerëzve që i përdor si dublues. Paranoja mori kahe të theksuar kur Putini u sfidua së fundmi nga kreu i mercenarëve të Wagnerit, Yevgeny Prigozhin. Prigozhini raportohet se tashmë ka marrë këshilla për të ndenjur larg dritareve e të mos pranojë të pijë çajra për të shmangur vrasjen nga Putini.
Anthony Glees, profesor në Universitetin e Buckingamit, ka thënë për “Daily Star” se Putini do që Prigozhini të jetë i vdekur.
“Sipas meje, tre banditët, Putin, Prigozhin dhe Lukashenko (Presidenti bjellorus) po luajnë të gjithë me njëri-tjetrin, secili duke u përpjekur të testojë forcën e dy të tjerëve. Putini sigurisht që do ta donte Prigozhinin të vdekur. Prigozhin e ka poshtëruar dhe e ka mashtruar me tentativën e tij për grusht shtet dhe ata që e tejkalojnë Putinin përfundojnë të vdekur”, ka thënë Glees.