Kryeministri Edi Rama ka mbërritur në Vlorë paraditen e sotme, i shoqëruar nga tri ministre të kabinetit të tij. Mësohet se Rama, bashkë me ministren e shëndetësisë Ogerta Manastirliu, atë të Infrastrukturës dhe Energjitikës Belinda Balluku si dhe ministren e Arsimit Evis Kushi do të zhvillojë takime me rektorët e universiteteve në Vlorë.
Mësohet se gjithashtu, Rama do të ketë një takim edhe me asamblenë socialiste të Vlorës. Në focus të diskutimit të jetë sigurisht edhe përplasja me kryebashkiakun Dritan Leli. Nuk dihet nëse vetë kryeministri do të ndërhyjë në mënyrë që përballja mes këshillit bashkiak dhe Lelit të realizohet, apo ka ndonjë tjetër ‘plan’ në mendje.
Çfarë po ndodh mes Lelit dhe Këshillit Bashkiak?
Kryebashkiaku Dritan Leli nuk ka rënë as këtë herë dakort për të zhvilluar përballjen me anëtarët e Këshillit Bashkiak. Pasi këta të fundit kërkuan përballjen fizikisht në datë 30 qershor në teatrin “Petro Marko”, Leli këmbëngul që mbledhja të zhvillohet online. Dritan Leli ka refuzuar më herët tre herë mbledhjen e Këshillit Bashkiak për shkak të masave anti-Covid që ishin planifikuar të mbaheshin në ambientet e Universitetit “Ismail Qemali” dhe në ambientet e Teatrit “Petro Marko”.
Leli i shmangu me “procedurë” mbledhjet e Këshillit Bashkiak, pasi sipas tij duhen respektuar masat anti-COVID. Pavarësisht se Ministria e Shëndetësisë i dha lejen, Leli ka dashur të tregohet korrekt dhe ka preferuar të mos shkojë. Këshilli Bashkiak i Vlorës, ka kërkuar një mbledhje jashtë radhe me kryetarin e bashkisë, pasi sipas tyre, situata e shërbimeve vendore është alarmante. Ata ftuan në mbledhje deputetët e Vlorës, përfshirë edhe kryeministrin Edi Rama.
Leli është ‘shpallur’ tashmë si i padëshiruar nga kryeministri Edi Rama që prej momentit që nuk pranoi të hiqte dorë nga posti i kryetarit të bashkisë Vlorë për t’u angazhuar në fushatë elektorale si kandidat për deputet.