Në Kongresin e UEFA-s të mbajtur në Romë u miratua ditën e sotme raporti vjetor për luftën kundër trukimeve në futboll. “Duke mbrojtur integritetin e futbollit”, shkruhej në pjesën e raportit vjetor, teksa u pasqyrua edhe tabloja e punës që ishte bërë nga komisionet disiplinore për sezonin që u la pas.
Plot 54 presidentë të vendeve anëtare, votuan në mënyrë unanime për raportin, teksa pjesë e tyre ishte edhe kreu i FSHF-së Armand Duka, i cili nuk nguroi të ngrinte kartonin jeshil, duke mbështetur UEFA-n pavarësisht se një nga pikat kyçe të raportit vjetor ishte dhe dënimi me 10 vite i Skënderbeut.
“Sektori i disiplinës dhe etikës në UEFA trajtoi një total prej 450 çështjesh gjatë vitit të fundit, 49 prej të cilave ishin pjesë e apelimit dhe katër përfunduan para Gjykatës së Arbitrazhit Sportiv (KAS).
Një çështje që spikat në mënyrë të veçantë përfshin KF Skënderbeun e Shqipërisë, një klub i përjashtuar nga aktivitetet e UEFA për sezonin 2016-2017 për përfshirjen në trukimet e ndeshjeve, vendim i cili u mbështet nga KAS. Si rrjedhojë e hetimeve të tjera, organet disiplinore të UEFA-s vendosën një përjashtim prej 10 vitesh nga aktivitetet e UEFA dhe një gjobë prej 1 milion eurosh për Skënderbeun”, shkruhet në raportin e UEFA-s.
