Mos i keqpërdorni simbolet e UÇK-së për interesa politike. Kjo është thirrja e përsëritur e Organizatës së Veteranëve të Luftës së UÇK-së drejtuar pjesëmarrësve në protestën disaditore që po zhvillohet në Tiranë.
Në një deklaratë publike, organizata shpreh shqetësimin për atë që e cilëson si përpjekje të vazhdueshme për manipulim politik dhe përdorim të simboleve të Ushtrisë Çlirimtare të Kosovës në funksion të agjendave të caktuara.
“Organizata e Veteranëve të Luftës së UÇK-së shpreh publikisht shqetësimin e saj për përpjekjet e vazhdueshme për manipulim politik dhe instrumentalizim të simboleve të UÇK-së në protestën disaditore në Tiranë”, thuhet në deklaratë.
Kryetari i organizatës, Hysni Gucati, akuzon disa prej pjesëmarrësve në protestë se prej vitesh kanë tentuar të zbehin dhe të devijojnë vlerat e luftës çlirimtare.
“OVL e UÇK-së rithekson me përgjegjësi të plotë se kauza e UÇK-së nuk është dhe nuk mund të jetë instrument i asnjë agjende politike të ditës apo i interesave të ngushta personale e partiake”, vijon deklarata.
Veteranët u bëjnë thirrje organizatorëve të protestës që të garantojnë integritetin e saj dhe të mos lejojnë manipulime, keqpërdorime apo vetëdeklarime të rreme në emër të ish-ushtarëve të UÇK-së.
Sipas tyre, UÇK-ja përfaqëson historinë e lirisë dhe sakrificës së popullit shqiptar dhe duhet trajtuar me respekt, pa u përdorur për përfitime politike.
Organizata thekson se ky nuk është qëndrimi i parë që mban mbi këtë çështje, por një apel i përsëritur ndaj të gjithë aktorëve të përfshirë.
Veteranët sqarojnë gjithashtu se organizata ka përfaqësinë e saj zyrtare në Tiranë dhe se askush nuk është autorizuar prej saj për ta përfaqësuar në protestën që po zhvillohet në kryeqytetin shqiptar.