Humbja e radhës e Real Madrid kundër Tottenham në gjysmëfinalen e “Audi Cup” është shoqëruar me reagimin e ashpër të mediave madrilene, por jo vetëm edhe të tifozëve.
Dy të përditshmet më të mëdha “AS” dhe “Marca” kritikojnë ashpër skuadrën “los blancos” për paraqitjen e dobët. “Pas “turpërimit” në ndeshjen e javës së shkuar kundër Atletico Madrid, tifozët prisnin reagimin e të besuarve të Zidane, por sërish u zhgënjyen”, lexohet në komentin e gazetës “Marca”.
Humbja kundër Tottenham ka shtuar dyshimet edhe mbi të ardhmen e Zinedinë Zidane, teksa aventura e dytë e teknikut francez në pankinën madrilene mund të përfundojë shumë më shpejt nga sa ishte parashikuar.
Nën akuzë edhe transferimet e mëdha të verës, mbi të gjithë Eden Hazard. Futbollisti belg u ble me shumë zhurmë nga Chelsea, por deri tani më shumë se për cilësitë teknike, po flitet për formën fizike të futbollistit, që le për të dëshiruar.