Kreu i KQZ-së, Ilirjan Celibashi i dha 48 orë kohë përfaqësuesve ligjorë të grupimit “Alibeaj” që të plotësojnë dokumentacionin dhe të qartësojnë çështjen e “Autorizimit” të lëshuar një vit më parë nga kryetari i dorëhequr i Partisë Demokratike, Lulzim Basha, para se të vendosë për regjistrimin e PD-së në zgjedhjet lokale.
Ky vendim u ankimua nga Enkelejd Alibeaj në KAS. Komisioni i Ankimimeve dhe Sanksioneve nuk pranoi të shqyrtojë ankimimin dhe e ktheu sërish çështjen në KQZ.
Indrit Sefa, përfaqësuesi ligjor i grupit të Alibeajt, në një dalje për mediat, akuzoi Celibashin se po shpërdoron detyron dhe po shkel ligjin duke mbajtur qëndrime politike.
“KAS konfirmoi pretendimin tonë se komnisioneri është jashtë afatit ligjor për të marrë një vendim përfundimtar. Komisioneri duhet të merrte një vendim përfundimtar për të regjistruar PD-në si subjekt zgjedhor. Që prej datës 11, ora 10:00 është në shkelje të afateve ligjore. Komisioneri nuk po respekton afatet proceduriale dhe afatet ligjore. Afatet janë të përcaktuara qartë. I bëj thirrje komisionerit që të ndalojë këto dispozita dhe të marrë parasysh kërkesën e PD-së për regjistrim. Komisioneri ka mbajtur qëndrime politike. Është jashtë procedurës ligjore. Ka bërë ndërhyrje të direkta për paracaktimin e rezultatit zgjedhor. Të marrë në konsideratë kërkesën e PD-së. Kjo është vendimarrja e KAS-it. I bëjmë thirrje të ndërmarrë vendim.”