Sulmuesit e ekipit kuqezi vijojnë që të jenë në formë të shkëlqyer edhe pas angazhimeve me fanellën kuqezi. Rey Manaj dhe Jasir Asani kanë gjetur sërish rrugën e rrjetës me skuadrat respektive, duke konfirmuar momentin e tyre të mirë.
Rey Manaj ka shënuar me klubin e tij Al Sharjah. Sulmuesi lushnjar realizoi golin e dytë në fitoren 2-0 ndaj Al Dhafra, duke vulosur suksesin e skuadrës në ndeshjen e kampionatit të Emirateve të Bashkuara Arabe.
Në të njëjtën valë pozitive është edhe Jasir Asani, i cili vazhdon të jetë protagonist me Esteghlalin në kampionatin iranian. Sulmuesi anësor shënoi golin e parë të takimit në fitoren ndaj Mes Rafsanjan, duke i dhënë avantazhin ekipit të tij në minutën e 11-të. Me një goditje precize nga kufiri i zonës, Asani tundi rrjetën dhe ndezi festën e tifozëve vendas.