Inflacioni, destabiliteti i çmimeve të mallrave dhe shërbimeve, rrogat në vendnumëro ose me rritje mjerane, si dhe mungesa e interesit të qytetarëve për të futur kursimet, ndërkohë që parashikimet për të ardhmen janë tejet të zymta, Banka e Shqipërisë u detyrua sot që të rrisë normën bazë të interesit.
Në mbledhjen e datës 5 tetor 2022, Këshilli Mbikëqyrës i Bankës së Shqipërisë vendosi që norma bazë e interesit të rritet në nivelin 2.25%. Sakaq norma e interesit të depozitës njëditore u vendos të rritet në nivelin 1.25%. Kurse norma e interesit të kredisë njëditore u vendos të rritet në nivelin 3.25%.
Guvernatori Gent Sejko tha se inflacioni është rritur shumë duke kapur nivelin 7.5% – 8% dhe paralajmëroi se do të vazhdojë të jetë i lartë për të paktën edhe 2 tremujorët e ardhshëm.
“Inflacioni u rrit në muajt korrik e gusht 2022, duke shënuar vlerat respektive prej 7.5%. Ekonomia shqiptare vijoi rritjen në 6 muajt e parë, por ritmi i rritjes u ngadalësua në 3-mujorin e dytë. Inflacioni do të mbetet i lartë në dy 3-mujorët në vazhdim, por në fillim të 2023 do të fillojë ulja”,- deklaroi guvernatori Sejko.
Inflacioni është një tregues i rëndësishëm që reflekton në jetën e përditshme të qytetarëve. Ndonëse zyrtarisht thuhet se shifra është rrotull 8 për qind, fakt është se çmimet janë rritur shumë më tepër dhe rritja po vijon me hapa galopante.
SHIFRAT KRAHASUESE
Këshilli Mbikëqyrës i Bankës së Shqipërisë vendosi:
të rrisë normën bazë të interesit në nivelin 2.25% nga 1.75%, të rrisë normën e interesit të depozitës njëditore në Bankën e Shqipërisë në nivelin 1.25% nga 0.75%, të rrisë normën e interesit të kredisë njëditore në Bankën e Shqipërisë në nivelin 3.25% nga 2.75%.