Ish-kryeministri i Shqipërisë Aleksandër Meksi ka rrëfyer si dëshmitar okular se si u mor vendimi për heqjen e yllit të kuq nga Flamuri ynë Kombëtar.
Meksi sqaron se propozuesi ka qenë ai teksa në një prej seancave plenare të vitit 1992 ka kërkuar që tashmë të hiqet ky simbol i komunizmit, raporton tirananews.al.
Ai kujton se një prej pjesëmarrësve në atë sallë i ka kërkuar që këtë propozim ta zyrtarizojë me shkrim, ndërsa u detyrua më pas që të nxitojë e të marrë edhe 25 firmat e nevojshme po në atë moment duke i dhënë fund edhe simbolikisht regjimit komunist në vendin tonë.
“Me qenë se u përmend këtu si u hoq ylli nga Flamuri Kombëtar në fillim të prillit 1992…po e tregoj si dëshmitar i atij akti.
Isha unë që bëra propozimin me gojë nga vendi….nga krahu i majtë i sallës dikush foli që duhet me shkrim propozimi dhe unë shkruajta me nxitim…siç dhe shihet…dhe nxitova t’ia dorëzoja Kryetarit Z. Arbnori…por prap i njëjti zë tha se duhen 25 firma. U ktheva tek bankat dhe shumë nga deputetët u afruan dhe fimosën, e dorëzova dhe u miratua…”, kujton ish-kryeministri Meksi.