Kryeministri Edi Rama, lidhur me skandalin e publikimit të pagave, tha se ‘jo çdo e keqe vjen vetëm për keq’.
Këtë kreu i qeverisë lidhi me mosdeklarimin e pagave. Ai iu referua pagave të gazetarëve dhe tha se ato duhet të deklarohen saktë deri më 20 janar 2022, përndryshe do të hetohen për evazion fiskal.
‘Me pagat ka ndodhur një ngjarje shumë shëmtuar dhe shqetësuese, por pjesa kriminale e ngjarjes është një pjesë që i takon prokurorisë, ku po heton në mënyrë intensive. Besoj që së shpejti do të kemi rezultate dhe kush e ka bërë do të përgjigjet para ligjit.
Në këndvështrimin më afatmesëm kjo ngjarje mund të quhet edhe ‘jo çdo e keqe vjen vetëm për keq’.
Natyrisht ekspozimi i dhënave personale që lidhen me pagat është i papranueshëm, por sot ka një pasqyrë domethënëse në sytë e të gjithë shqiptarëve. Askush nuk do të mund të ma thotë se po sulmojmë askënd, duke filluar nga mediat, nga pagat tuaja. Nuk është një situatë e ngjashme me atë që ka qenë më parë, por është situatë e pranueshme dhe askush nuk na thotë dot se po sulmojmë mediat, duke kërkuar prej atyre që të vetë-rregullojnë deklarimet.
Drejtoria e Tatimeve do të nisë një letër për të gjithë tatimpaguesit me deklarime shqetësuese, që rezultojnë me mospërputhje flagrante, duke u kërkuar të vetërregullohen me deklarime të reja deri më 20 janar. Në rast mosrregullimi do të ketë hetim të thelluar për evazion. Në rast të pasaktë, dënohen me burg”, paralajmëroi Rama.