Lehtësime dhe thjeshtime procedurash parashikohen në udhëzimin e ri për autoshkollat, që shumë shpejt do të jetë gati nga Drejtoria e Përgjithshme e Shërbimeve të Transportit Rrugor.
Aktualisht vijojnë konsultimet me përfaqësues të autoshkollave, për përmirësimet e pritshme dhe të sistemit të ri operativ të integruar të patentës.
Draft udhëzimi i ri i DPSHTRR-së për autoshkollat parashikon një sërë lehtësimesh dhe procedurash për të mos pasur etapa e ndalesa të tepërta për aplikantët. Si për shembull, të bëjë disa herë foto, e disa herë firma e pritje. Mjaft e rëndësishme është dhe zgjatja e afatit të vlefshmërisë së teorisë kur ngec në praktikë, për të mos paguar disa herë për rikthim në teori. Burime për tirananews.al bëjnë të ditur se me autoshkollat po diskutohet që ky afat të bëhet nga 6 muaj në 3 vjet.
Në reformimin e këtij sistemi parashikohen gjithashtu edhe postimi në adresë shtëpie me konfirmimin e aplikantit, radhën e aplikimit online për të shmangur kështu orët pritje në drejtoritë rajonale. Por jo vetëm kaq. Synohen edhe projekte edukative me shkollat e bashkitë.
TESTI I TEORISË
Përsa i përket testit teorik për klasin B të patentës u rishikuan një për një të 4893 pyetjet zyrtare, ku u eleminuan një mijë pyetje ngatërrestare, u korrigjuan 1500 peytje me gabime shkrimi ose fjalë të tepërt. Krahas kësaj, krijohet uebi i ri i DPSHTRR për përballimin e volumit të testimit simulim si real online. Rregullimi i pyetjeve do të bëhet në çdo kategori tjetër lejedrejtimi, kualifikimi dhe certifikimi.
Një tjetër risi e Sistemit të Integruar të Lejedrejtimit përfshin nga aplikimi, rendi, shorti për komisionet, eliminimi i sorrollatjeve deri te dorëzimi direkt te autoshkollat.
Ndërkaq, përsa i përket këtij sektori do të merren masa për ti dhënë fund autoshkollave “fasadë”, trukeve dhe hileve në testimin e praktikës, si dhe fryrjes artificiale të tregut të autoshkollave.