Bajerni i Mynihut njihet si një klub i cili u qëndron shumë strikt rregullave të tyre të brendshme. Bavarezët jo pak herë kanë treguar se edhe pse e kanë mundësinë financiare për të shpenzuar shifra të çmendura apo për t’i ofruar kontrata marramendëse futbollistëve, sërish nuk dalin nga tradita e tyre.
Së fundmi, ishte Karl-Hajnz Rumenige, ai i cili u shpreh mbi shifrat e merkatos në ditët e sotme, apo pagat faraonike që përfitojnë lojtarët, ndërsa shtoi se Bajerni nuk do të bëhet pjesë e kësaj çmendurie. “ Ajo që më shqetëson nuk janë vetëm shumat prej 100 apo 120 milionë për të transferuar një futbollist. Tashmë, këtu nuk ka asgjë spektakolare. Por, më shqetësojnë rrogat e futbollistëve, mbi të gjitha në Spanjë, Angli dhe Itali. Dhe tendenca është te të paguarit neto.
Duhet të kemi kujdes për të mos destabilizuar rendin tonë të pagave. Për shembull Grizman, përfiton pagë milionere dyshifrore në sezon dhe neto. E gjitha kjo, duhet shumëzuar me dy pasi klubi është përgjegjës edhe për të paguar taksat. Por, Bajerni nuk do të marrë pjesë në këtë çmenduri”, u shpreh Rumenige.