KHARKIV– Të paktën 12 persona kanë vdekur dhe më shumë se 40 të tjerë janë plagosur si pasojë e një sulmi rus që goditi një dyqan të madh në Kharkiv.
Sulmi i së shtunës erdhi teksa forcat ruse vazhdojnë të përparojnë në Ukrainën verilindore pasi kaluan kufirin në fillim të këtij muaji dhe hapën një front të ri në konfliktin dyvjeçar.
Përveç dhënies së numrit të fundit të vdekjeve, Zyra e Prokurorit Rajonal të Kharkiv tha se numri i personave të lënduar nga shpërthimi është rritur në të paktën 43. Sipas zyrtarëve kishte rreth 200 njerëz brenda ndërtesës kur ndodhi sulmi.
“Sirena e sulmit ajror ra dhe disa njerëz arritën të dilnin nga ndërtesa, afërsisht 100 persona. Megjithatë kishte ende njerëz brenda ndërtesës,”tha të shtunën në një intervistë në televizionin kombëtar Oleh Syniehubov, kreu i administratës ushtarake rajonale të Kharkiv.
Presidenti ukrainas Volodymyr Zelensky e cilësoi sulmin një “sulm brutal”, në një postim në X. Ministri i Brendshëm i Ukrainës Ihor Klymenko tha se sasi të konsiderueshme materialesh të ndezshme brenda hipermarketit po e bëjnë më të komplikuar shuarjen e zjarrit, duke shtuar se ekziston gjithashtu mundësia që zjarri të përhapet në magazinat aty pranë.
“Në të njëjtën kohë, ekziston një kërcënim i vazhdueshëm i bombardimeve të përsëritura të armikut,” tha Klymenko, sipas CNN.
Pas sulmit të së shtunës, Zelensky përsëriti se nëse Ukraina do të kishte mjaftueshëm sisteme të mbrojtjes ajrore dhe avionë modernë luftarakë, sulme të tilla ruse do të ishin të pamundura.
“Kjo është arsyeja pse ne u bëjmë thirrje të gjithë liderëve, të gjitha shteteve: ne kemi nevojë për një fuqizim të konsiderueshëm të mbrojtjes ajrore,” tha ai.