Tre javë pas dozës së parë të vaksinës anti-Covid, në organizëm aktivizohen antitrupat në 99% të rasteve. Ndërsa 7 ditë pas dozës së dytë në trup zhvillohen 100% antitrupa.
Këto janë statistikat e bëra publike nga Spitali Pediatrik në Romë Bambino Gesu, pas vaksinimit të personelit mjekësor. Vaksinën e kanë marrë 3000 punonjës dhe në pothuajse të gjitha rastet është vërejtur se mbrojtja imunitare është rritur gradualisht 7 ditë pas injektimit të parë.
Gjithashtu në asnjë rast, pas marrjes së vaksinës, nuk është verifikuar prekja nga koronavirusi pas ditës së 14. Ekspertët specifikojnë se gjithsesi në 14 ditët e para të dozës së parë të vaksinës trupi nuk ka krijuar ende imunizim të plotë apo të mjaftueshëm.
Dhe kështu ndër 3000 rastet e marra në shqyrtim, vetëm 7 persona të vaksinuar janë prekur nga koronavirusi, por në 10 ditëshin e parë të marrjes së dozës së parë.
Gjithsesi në të gjitha këto raste, Covid-19 është shfaqur me simptoma të lehta ku nuk ka qenë i nevojshëm shtrimi në spital për asnjë nga të infektuarit.