Michael Schumacher, shtatë herë kampion i botës në Formula 1, ka firmosur një helmetë që do të dalë në ankand për të mbledhur fonde në mbështetje të luftës kundër demencës.
Kjo nismë bamirësie është ndërmarrë nga legjenda skoceze e F1, Jackie Stewart, i cili prej vitesh po përballet me sëmundjen e bashkëshortes së tij, Helen, e diagnostikuar me demencë që në vitin 2014.
Me ndihmën e bashkëshortes së tij, Corinna, Schumacher vendosi inicialet e tij mbi helmetë, një gjest domethënës që ka prekur botën e motorsportit.
Helmetën e veçantë e kanë firmosur të gjithë kampionët e gjallë të Formula 1 – gjithsej 20 – dhe ajo u prezantua për publikun përpara Çmimit të Madh të Bahrainit.
Sir Jackie Stewart, themelues i organizatës bamirëse Race Against Dementia që nga viti 2016, e përdori këtë helmetë gjatë një xhiroje demonstrative me Tyrrell-in e vitit 1973, makinë me të cilën ai fitoi titullin e tij të tretë dhe të fundit në Formula 1.
“Është fantastike që Michael ka firmosur helmetën për këtë kauzë, për një sëmundje që ende nuk ka shërim. Bashkëshortja e tij e ndihmoi për ta realizuar këtë,” deklaroi Stewart, me shumë emocion.
Fatkeqësisht, siç raportojnë mediet gjermane, Schumacher nuk është më në gjendje të flasë.
Legjenda gjermane e F1 u aksidentua rëndë gjatë një shëtitjeje me ski në dhjetor të vitit 2013 në Alpet Franceze, duke pësuar dëmtime të rënda në kokë.
Që nga ajo kohë, ai ka qëndruar larg syrit të publikut dhe vazhdon të marrë trajtim mjekësor të përhershëm në vilën familjare pranë liqenit të Gjenevës, në Zvicër.
52 vjet pas tërheqjes nga Formula 1, Sir Jackie Stewart u rikthye në pistë për një moment simbolik, duke bërë disa xhiro në Circuito Internacional të Bahrainit, duke nderuar historinë e tij dhe duke u angazhuar njëkohësisht në një kauzë humane me rëndësi të jashtëzakonshme.
