Sportistët serbë të cilët kanë fituar medalje në Lojërat Olimpike “Paris 2024” kanë festuar në Beograd të hënën, me këngë nacionaliste për Kosovën.
Sipas mediumit serb ‘telegraf.rs‘, një video e publikuar të martën tregon tenistin e famshëm Novak Djokoviç duke kënduar këngën “Oj Kosovo, Kosovo” në një klub nate.
Djokoviç shihet duke u ngritur në këmbë dhe brohoritur, ndërsa atij i bashkohen edhe basketbollistët. Kjo këngë përmban fraza si “e gjithë Serbia bërtet: ‘Nuk e lëshojmë Kosovën’” dhe “Oj Kosovë, oj Kosovë, toka ime e dashur”.
Djokoviç dhe sportistë të tjerë serbë janë njohur më parë për përfshirjen e propagandës serbe në sport. Vlen të përmendet se vitin e kaluar, Djokoviç dhe ekipi serb i tenisit hynë në turneun “Davis Cup” duke kënduar këngë nacionaliste për Kosovën, gjë që shkaktoi reagime të shumta.