Ndryshimi i tribunave të tifozëve në derbi nuk ka qenë kërkesa e vetme e policisë së kryeqytetit sa u përket masave të sigurisë për këtë ndeshje, por edhe për sfidat e tjera që luhen në “Selman Stërmasi”. Sot klubi i Tiranës ka përfunduar edhe procesin e vendosjes së kamerave të sigurisë në të gjithë ambientet e stadiumit, brenda dhe jashtë tij, ashtu si edhe në tribuna, në mënyrë që të monitorohet plotësisht çdo ngjarje në impiant.
Polica e kryeqytetit kishte kërkuar që para derbit të fazës së parë që të montohej një sistem i tillë monitorimi, pasi kështu ishte më e thjeshtë jo vetëm parandalimi i ngjarjeve të rënda ku kërkohej ndërhyrja e forcave të rendit, por edhe identifikimi i atyre që vepronin në prishje të rendit publik gjatë ndeshjeve.
Kërkesa u anashkalua për disa muaj, derisa erdhi radha e derbit, me klubin e Tiranës që ka vendosur që të vihet në lëvizje e të plotësojë këtë kërkesë, duke llogaritur se që pas ndeshjes së parë mes dy skuadrave, ndaj bardhebluve ishte hapur procedim penal për mosmarrje masash të duhura për organizimin e sfidës.
Kamerat janë montuar dhe janë vënë në punë në pjesë të ndryshme të stadiumit, ndërsa do të ketë një “sallë operative” të improvizuar në ambientet e brendshme nga ku mund të monitorohet situata në çdo tribunë.