Federata Spanjolle e Futbollit ka përcaktuar gjyqtarin Hezus Gil Manzano si personin që do të vërë drejtësi në takimin e së sotëm në La Liga mes Bilbaos dhe Barcelonës në “San Mamez”.
Menjëherë pas caktimit të tij si gjyqtar për këtë takim kanë ardhur dhe reagimet nga mediat katalanase. Ato i kanë bërë një rezyme historisë së tij me Barcelonën ku bien në sy plot 10 kartonë të kuq, që ai ka nxjerrë nga xhepi për lojtarët “Blaugrana”. Rasti më i fundit dhe që bëri jo pak zhurmë ishte ai i sulmuesit Robert Levandovski në “El Sadar” (Pamplonë) kundër Osasunës. Si të mos mjaftohej me kartonin e kuq, Manzano raportoi për ofendimet e Levës që çuan në pezullimin me tri takime të sulmuesit polak.
Por Levandovski nuk është i vetmi emër i madh ndër katalanasit që ka parë kartonin e kuq nga gjyqtari Manzano. Para tij, ndër sulmuesit e Barcelonës e kanë provuar dushin para kohe edhe Lionel Mesi, Nejmar e Luis Suarez. Nga lojtarët aktualë të Barcelonës, përveç Levandovskit, kartonin e kuq nga Manzano e ka parë edhe Serxhi Roberto.