Në emisionin “Opinion”, kryetari i Partisë Demokratike, Sali Berisha, deklaroi se PD do të marrë pjesë në zgjedhjet e parakohshme për Bashkinë e Tiranës, edhe pse theksoi se “me Edi Ramën nuk ka zgjedhje të lira”.
“Me Edi Ramën nuk ka zgjedhje, por nuk i bojkotojmë. Ne do të hyjmë në zgjedhje”, – tha Berisha. Ai iu përgjigj edhe propozimit të kryetarit të partisë “Mundësia” për të nxjerrë një kandidat të përbashkët të opozitës. “Ne do të bëjmë gjithçka që të bashkëpunojmë me të gjitha partitë opozitare. Besoj se mund të arrihet të kemi një kandidat konsensual. Emri i kandidatit mund të jetë jashtë një partie apo tjetrës, e pamundur nuk është”, – theksoi Berisha.
Kreu i PD përmendi edhe emrin e Ilir Alimehmetit, duke thënë se “ploteson të gjitha kushtet për të kandiduar për kryetar bashkie në Tiranë”.
“Nëse gjendet një figurë konsensusi e të gjithë opozitës, do të ishte akoma më mirë”, përfundoi Berisha.
Në këtë mënyrë, PD konfirmon pjesëmarrjen e saj në garën për Bashkinë e Tiranës, duke lënë hapur mundësinë e një kandidati të përbashkët opozitar.