Detaje të reja janë mësuar në lidhje me sherrin e ndodhur mëngjesin e djeshëm mes shqiptarëve në Trieste të Italisë. Mediat lokale raportojnë se nga kjo ngjarje e ndodhur rreth orës 08:00 të mëngjesit u plagosën tetë persona dhe dy prej tyre janë në gjendje të rëndë shëndetësore. Të shtënat ndodhën pranë një lokali dhe ishin njerëzit përreth ata që njoftuan ambulancën dhe policinë e cila ka arrestuar dy persona deri më tani.
Fillimisht u bë e ditur se të shtënat ndodhën për shkak të një mosmarrëveshjeje mes kosovarëve dhe shqiptarëve por në realitet përplasja ndodhi mes dy familjeve kosovare. Personat e përfshirë janë të moshës 20 deri në 40 vjeç dhe janë të punësuar në sektorin e ndërtimit. Ka qenë një kontratë ndërtimi ajo që ka nxitur grindjen mes dy familjeve, pasi njëra kishte vjedhur nga tjetra. Për më tepër, origjina e armiqësisë ishte një marrëdhënie midis vajzës së njërës familje dhe një anëtari të tjetrës.
Rivaliteti mes dy familjeve arriti kulmin në të shtënat që ndodhën lokal. Disa ankesa ishin paraqitur në Prokurori për kërcënime dhe përndjekje të cilat kishin rezultuar në procedim penal. Dosjet e lidhura tani do të skanohen për të hetuar situatën. Detyra e Prokurorit do të jetë gjithashtu të vërtetojë nëse ditët e fundit ka pasur fakte të tjera që kanë përshpejtuar situatën deri në organizimin e sherrit me armë zjarri.