Shitja e Vllaznisë tashmë ka më në fund një date të saktë se kur do të mbyllet procesi i pranimit të ofertave dhe fillimi i shqyrtimit të tyre për të mësuar se kush do të jetë pronari i ri i klubit shkodran. Bashkia e Shkodrës ka miratuar me vendim të Këshillit Bashkiak hapjen e ankandit për shitjen e plotë të aksioneve të kuqebluve dhe tashmë priten ofertat e palëve të interesuara të cilat janë të shumta, siç raportohet nga Shkodra.
Sipas portalit ”ShkodraWeb”, data e fundit e caktuar për pritjen e këtyre ofertave është me 9 mars dhe pastaj do të jetë komisioni i ndërtuar në bashkëpunim mes Bashkisë së Shkodrës dhe FSHF-së ai që do të përcaktojë se cilat oferta duhen marrë në konsideratë për garën finale.
Edhe pse Bashkia e Shkodrës është një ent publik, ajo ka kërkuar ndihmën e FSHF-së për të finalizuar shitjen e klubit Vllaznia. Ndaj pjesë e komisionit prej 5 personash janë dy përfaqësues të FSHF-së, të cilët do të jenë pjesë e vendimmarrjes për shitjen e klubit dhe përcaktimin e ofertës fituese.