Ish-lojtari i kombëtares malazeze, Romës dhe Juventusit, Mirko Vuçiniç është ylli i radhës i futbollit që u gjend në konflikt me organet e drejtësisë për shkak të ‘këshillave të këqija’. Vuçiniç u dënua sot me dy vjet burg me kusht për evazion fiskal, përkatësisht të kryera nga viti 2014 deri në vitin 2017, teksa dyshohet se ka fshehur 6 milionë euro, të cilat nuk i ka raportuar në organet tatimore italiane.
Ish-sulmuesi i Romës dhe Juventusit kishte një vendbanim të përhershëm të regjistruar në Itali dhe fitonte para të padeklaruara si lojtar i Al Jazira-s në Emiratet e Bashkuara Arabe. Vuçiniç e ka bazuar mbrojtjen në faktin se rrogën e ka marrë në Emiratet e Bashkuara Arabe, por prokurorët kanë vërtetuar se në atë kohë ai ishte ende i regjistruar në Itali dhe se në atë kohë ka banuar edhe në atë vend.
Përfaqësuesit e bindën Vuçiniç se ai nuk është i lidhur fiskalisht me Italinë dhe me shpalljen e vendimit, gjyqtarja Valeria Fidelle urdhëroi bllokimin e të gjitha llogarive rrjedhëse të Vuçiniç dhe konfiskimin e pasurisë së tij. Vuçiniç e përfundoi karrierën e tij në vitin 2017, duke lënë gjurmën e tij më të madhe në Serinë A italiane.