Klubi i Futbollit Tirana ka prezantuar këtë të premte stafin e ri. Trajneri i ri, Bledi Shkëmbi dhe drejtori i sapoemëruar, Agim Ibraimi. Ky i fundit tha se tek Tirana lojtarët nuk do vijnë sa për numër, teksa trajneri Shkëmbi shtoi se nëse dështon atëherë ai largohet, ndaj të gjithë duhet të punojnë për suksesin e ekipit.
“Falenderoj drejtuesit për mundësitë se ëbëhet fjalë për Tiranën me histori të madhe. Unë e di mirë çfarë më pret dhe ku kam ardhur, falenderim edhe për Federatën se më dhanë mundësinë t’i bashkohem këtij klubi të madh. Isha trajner i U17, por dëshira e drejtorit dhe presidentit bënë që të merrja përsipër Tiranën. Kam drejtuar skuadra të tjera, por Tirana është diçka tjetër. Marrëdhënia me tifozët? “Nuk jam shquar si afërt me ta edhe kur isha futbollist, më respektojnë dhe i respektoj. Tifozët e Tiranë i njoh mirë, edhe kur kam qenë kundërshtar kam folur mirë për ta. Dua që tifozët t’i bëjmë vërtet në lojtarin e 12. Kur i kam pasur kundërshtar më kanë vënë në presion. Tifozët e “Tironës” të jenë lojtari i 12, nëse mua nuk më shkon puna atëherë do iki, por skuadra është përgjithmonë”, tha Shkëmbi.
Nga ana tjetër, drejtori i ri sportiv, Agim Ibraimi tha se te Tirana nuk do vijnë më lojtarët sa për numër. “Është nder dhe kënaqësi të jem pjesë e kësaj skuadre dhe me tifozeri të flaktë. Kanë histori të madhe që më motivon, çdo rrugëtim i ri nuk është i lehtë. Jemi në rindërtim e sipër, do të tregohemi të kujdesshëm për të marrë vendimet e duhura në periudhë afatgjate. Do të shohim edhe të rinjtë që të kemi sukses në vijim”.