Rritet shpërblimi për medaljet olimpike të fituara nga Shqipëria në “Paris 2024”, me Chermen Valiev dhe Islam Dudaev. Me vendim të Këshillit të Ministrave, përveç shpërblimit financiar të përcaktuar në ligj, dy sportistët medalistë do të përfitojnë edhe 14 milionë e 700 mijë lekë ekstra, për t’i ndarë mes tyre dhe trajnerëve.
Vendimi është publikuar në Fletoren Zyrtare, ku theksohej se “programit buxhetor ‘Për zhvillimin e sportit’, i shtohet fondi prej 14 700 000 (katërmbëdhjetë milionë e shtatëqind mijë) lekësh për shpërblimin e sportistëve fitues të medaljeve olimpike dhe me rezultate të larta, si dhe të trajnerëve të tyre, pjesëmarrës në Lojërat Olimpike ‘Paris 2024’. Shpërblimi do të përballohet nga fondi rezervë i buxhetit të shtetit.
Dy bronzët në mundje, të siguruara nga Valiev dhe Dudaev, i kanë siguruar sportistëve dhe trajnerëve të tyre të ardhura ekstra, për të vlerësuar arritjen historike të ekipit kuqezi në Olimpiadë. I ndarë mes sportistëve, shpërblimi i ri do të jetë 7 milionë e 350 mijë lekë për secilin prej medalistëve.
Deri më tani, Valiev dhe Dudaev kanë siguruar edhe nga 5 milionë lekë, sepse kjo është shifra e parashikuar në ligjin e përmirësuar të sportit, ku sportistët elitarë shpërblehen për arritjet e larta në arenën ndërkombëtare.