Policia e Fierit ka vendosur në pranga 36-vjeçarin Vilson Plaka, i cili shpërndante drogë me doza të vogla në qytet.
Gjatë një kontrolli të ushtruar në makinën e të riut, policia gjeti 35 doza kokaine, gati për shitje. Droga u sekuestrua në cilësinë e provës material, e bashkë me të, makinën që lëvizte i riu si dhe një celular.
Njoftimi i Policisë:
Goditet një tjetër rast i shpërndarjes së drogave të forta në doza.
Vihet në pranga drejtuesi i mjetit ku u gjetën doza me lëndë narkotike kokainë.
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, në bazë të informacioneve të marra në rrugë policore se një shtetas që qarkullonte me automjet, shpërndante lëndë narkotike të forta në doza, shërbimet e Komisariatit të Policisë Fier në bashkëpunim me Seksionin për Hetimin e Narkotikëve dhe Seksionin Operacional në DVP Fier, kanë bërë të mundur lokalizimin dhe ndalimin e mjetit të dyshuar.
Gjatë kontrollit të ushtruar në automjetin tip “Benz” me drejtues shtetasin V. P. (J)., iu gjet sasi lëndë narkotike kokainë e ndarë në 35 doza gati për shitje, të cilat u sekuestruan në cilësinë e provës materiale së bashku me automjetin dhe 1 celular.
Në përfundim të veprimeve, specialistët e Seksionit për Hetimin e Narkotikëve në DVP Fier bënë arrestimin në flagrancë të drejtuesit të mjetit, shtetasit V. P. (J)., 36 vjeç, banues në Kuman, Roskovec.
Materialet i kaluan Prokurorisë pranë Gjykatës së Shkallës së Parë Fier, për veprën penale “Prodhimi dhe shitja e narkotikëve”.