Teksa dënon etiketimin e shqiptarëve si pushtues nga ana e sekretares së Brendshme të Britanisë, nga Kukësi, Presidenti Bajram Begaj tha se në këtë qytet të hapet një mikro-konsullatë dhe që qytetarët të ikin me viza të rregullta të përkohshme.
“Shqiptarët nuk mund të etiketohen si pushtues, ata jetojnë kudo në botë. Nuk jam aspak dakort me deklaratat e ministres britanike. Shqiptarët s’janë pushtues. Investimet të ndihmojnë shqiptarët në mënyrë që ata të mos largohen nga vendi. Britania të hapë një mikro-konsullatë në Kukës. Qytetarët të ikin me viza të rregullta të përkohshme”.
Po ashtu kreu i shtetit, tha se i ka kërkuar qeverisë britanike që investimet e saj t’i bëjë në drejtim të zonave ku ka emigrantë. “Rruga e duhur është që investimet të bëhen të prekshme nga qytetarët, të mos jenë vetëm në kuadrin e këshillimeve, por të jenë investime me qëllim që këta qytetarë që ikin për një jetë më të mirë, të punojnë e të jetojnë në Kukës, Dibër, Has e Tropojë”.
Presidenti komentoi edhe për situatën në veri të Kosovës. “Mesazhi im është që të ruhet qetësia dhe të vazhdojë dialogu, sepse vetëm përmes tij mund të arrihet zgjidhja e problemit. Situata globale në tërësi është e cenuar, situata është e qetë por shumë e brishte dhe në çdo kohë mund të ketë tensione. Ne si komb duhet të ruajmë qetësinë dhe të mos biem pre e provokime”.