Të lindurit mes viteve 1980- 2000 njihen si gjenerata Y apo “Millenials”. Shqiptarët e këtij brezi, që sot janë të moshave 18-45 vjeç, në një anketë të zhvilluar nga IDRAPOLL, thonë se nuk ndjehen të përfaqësuar nga partitë aktuale.
Pyetja e anketës që ka përfshirë 510 persona ishte: Shqipëria ka sot dy-tre parti politike kryesore dhe pastaj një numër të madh partish të tjera të cilat kanë peshë të vogël në elektorat. Duke menduar për skenën politike shqiptare dhe për ndjenjën tuaj të përfaqësimit nga partitë aktuale, a do të thoshit se?
Sipas përgjigjeve, vetëm 13% e të anketuarve të këtij grupimi deklarojnë se ndihen të përfaqësuar nga një parti politike ekzistuese dhe për të do të votonin sot. Nëse i shtojmë kësaj edhe 33% të cilët pavarësisht se nuk ndihen tërësisht të përfaqësuar nga asnjë parti, përsëri do të votonin për njërën prej tyre të cilën e ndjejne më afër, atëherë rezulton se vetëm 46% e kësaj grupmoshe do të votonte sot për një parti politike ekzistuese. Shumica e “Gjeneratës Y” (54%) nuk do të votonin sot për asnjë parti politike.
Rezultatet tregojnë se partitë politike në Shqipëri përballen me një ndjesi te madhe “mospërfaqësimi” që ka ky grupim në lidhje me to. Rreth 43% e tyre deklarojnë se nuk ndihen “FARE të përfaqësuar” dhe një pjesë tjetër prej 44%, deklarojnë se nuk ndihen “TËRËSISHT të përfaqësuar” nga partitë ekzistuese politike.
Për njohuri:
Brezi i Heshtur: Të lindurit mes 1928-1945
Baby Boomers: 1946-1964
Brezi X: 1965-1980
Millenials: 1981- 1996
Post-Millenials: 1997- dhe sot