Sonte në mbrëmje do të jepen dy biletat e para për gjysmëfinalen e Champions League. Milan apo Napoli vetëm një prej këtyre dy gjigandëve të futbollit italian do kaloj në turin tjetër të Ligës së Kampionëve. Lajmi i mirë për ekipin nga Milano është se do të luajë në fushë me formacionin më të mirë pasi infermieria kuqezi është boshatisur ndërkohë vendasit kanë rikuperuar yllin e skuadrës Viktor Osimhen edhe pse akoma nuk dihet nëse do ta nisë sfidën që nga minuta e parë.
Napoli kërkon të shkruajë historinë në stadiumin “Diego Armando Maradona” dhe për herë të parë të kualifikohet në gjysmëfinale e Champions League. Ndërkohë Milani i Piolit e sheh aventurën europiane si të vetmen mënyrë për të shpëtuar sezonin. Në takimin tjetër, Real Madrid është vetëm një hap larg kualifikimit pasi duelin e parë me Chelsea e fitoi 2-0.
Spanjollët një nga favoritët për të fituar dhe trofeun në fund luajnë me Blutë e Londrës që po kalojnë një nga periudhat më të errëta në historinë e tyre. Të pozicionuar në mesin e tabelës në Premier League dhe me asnjë fitore në 5 ndeshjet e fundit, londinezët do të bëjnë gjithçka vetëm për të fituar. Sa i përket mungesave, tek Chelsea janë të zakonshmit, Broja, Kulibali dhe Chillwell që është i skualifikuar. Ndërsa Reali do të rreshtohet me formacionin më të mirë.