Sonte në mbrëmje në “Olimpico” do të luhet finalja e Kupës së Italisë mes Fiorentinës dhe Interit. Skuadra e Vincenzo Italiano, mbërrin në këtë finale falë një rrugëtimi fantastik. Fillimisht duke eliminuar Sampdorian në fazën e 1/8-ve, më tej Torinon dhe në gjysmëfinale surprizën Cremonese.
Fiorentina e ka fituar 6 herë Kupën e Italisë, megjithatë ky trofe i mungon ekipit që prej vitit 2001, pasi në 2014 u mundën në finale nga Napoli. Në anën tjetër Interi kërkon të mbrojë trofeun e Kupës së Italisë, pasi skuadra e Simone Inzaghit ia doli mbanë të triumfonte për herë të fundit në finalen e madhe përballë Juventusit vetëm në shtesë me rezultatin 2-4.
Interi e ka fituar tetë herë më parë Kupën e Italisë. Për skuadrën e Simone Inzaghit do të jetë një provë e vërtetë përpara finales së madhe të Champions League përballë Manchester Cityt.
Përsa i përket historisë kjo do të jetë finalja e parë mes dy skuadrave në Kupën e Italisë.