Kombëtarja shqiptare e Futbollit, do të luajë këtë të mërkurë miqësoren me Arabinë Saudite, në Abu Dabi. Miqësorja nuk do të transmetohet në asnjë televizion, shqiptar apo të huaj. Kjo për shkak të kërkesës që ka bërë Federata Arabe e Futbollit.
Arabia Saudite është një ndër skuadrat e kualifikuara për në Botërorin e Katarit dhe është në një grup me Argjentinën, Meksikën dhe Poloninë. Për ta takimi me Shqipërinë është tepër i rëndësishëm dhe nuk duan që kjo ndeshje të jetë pikë referimi për rivalët e grupit.
Me grupin u bashkuan edhe 5 lojtarët të cilët kanë qenë të impenjuar me klubet e tyre këtë të diel, më konkretisht Ardit Toli, Mario Mitaj, Bekim Balaj, Elhan Kastrati dhe Gentian Selmani. Dueli luhet sot, në orën 16:30, me orën shqiptare.
Sa i përket formacionit që trajneri Edy Reja do të hedhë në fushë, në portë do të jetë Kastrati. Mbrojtja është produkt vendi me Jankun, Bitrin dhe Turkajn që mund të formojnë treshen e prapavijës. Mesfusha do të jetë e formuar nga Deliu, Toli dhe Kallaku, që nga krahët do të kenë Gurishtën dhe Mitajn.
Në sulm, kapiteni Cikalleshi e ka vendin e sigurt, por Reja duhet të gjejë partnerin e tij, me Xhixhën dhe Skukën që janë të etur për të shënuar golin e parë me fanellën kuqezi.