Dinamo Zagreb ka siguruar sot një nga sukseset më të mëdha në historinë e saj, teksa ka arritur kualifikimin në çerekfinalet e Ligës së Europës duke eliminuar me një kthim rezultati të pabesueshëm Totenhemin e Zhoze Murinjos që kishte në përbërje emra si Herri Kejn e Garet Bejl.
Totenhemi kishte fituar 2-0 ndeshjen e parë në Angli dhe ishte në pozita shumë të favorshme për të siguruar kalimin në turin tjetër të turneut. Me sa duket, kjo solli një nënvlerësim në ndeshjen e sotme, pasi ekipi londinez la shumë për të dëshiruar në lojën e tij në Zagreb, duke dështuar në mënyrë të pabesueshme.
Heroi i kroatëve u bë sulmuesi Mislav Orsiç, i cili në pjesën e dytë të sfidës ishte i jashtëzakonshëm. Ai arriti të shënonte në minutën e 62-të dhe të 83-të golat që i mundësuan Dinamo Zagreb që të çonte sfidën në shtesa. Aty, kur regjistrohej minuta e 106, ai shënoi edhe golin e 3-0, që kalonte skuadrën e tij në turin tjetër. Totenhemi u zgjua me vonese dhe Kejn me Bejl patën disa mundësi për të kthyer fatin e duelit, por gabuan para portës, duke përfunduar të eliminuar në mënyrë të turpshme nga Liga e Europës dhe duke vënë në dyshim vazhdimësinë e Zhoze Murinjos në pankinën e skuadrës.