Shqipëria do të luajë nesër kundër Andorrës dhe në konferencën për shtyp para ndeshjes trajneri i Kombëtares, Sylvinho deklaroi se kuqezinjtë do të paraqiten në fushë njësoj si në ndeshjen e parë të këtyre kualifikueseve, atë ndaj Anglisë.
Kur u pyet nëse do shohim një Shqipëri sulmuese që në fillim, apo do mundohemi të kontrollojmë kundërshtarin, Sylvinho u përgjigj: “Nesër ekipi ynë do jetë i njëjti që nisi kualifikueset kundër Anglisë. I njëjti shpirt, i njëjti ekip si është ndërtuar. Ne do jemi i njëjti ekip. Është e vërtetë, që mund të ketë ndryshim me një sulmues apo mesfushor tjetër, por ekipi i njëjtë, ndryshimet janë sipas ekipit me të cilit përballemi. Nesër na duhet fitorja. Ky është raundi i tretë për ne që jemi të detyruar për fitoren, që nga Letonia. Jemi ekip që pësojmë pak. Po ia dalim mirë deri tani, por ekipi është i njëjtë, nuk ndryshon. Kemi qetësinë dhe ekuilibrin”.
Nga ana tjetër tranjeri shtoi edhe se Andorra është ekip që lufton për çdo centimetër në fushë, është ekip që ata shpresojnë të fitojmë ndaj tij. ‘‘Më pyetët dhe them se është e vështirë. Kur flasim për ne, po rritemi si federatë, të gjithë po rriten dhe rezultatet janë Europiani, rruga e Botërorit. Është normal, diferenca është gjithnjë e më e vogël. Por më kryesorja është që futbolli është pasion.
Themi që në një ndeshje mund të ndodhë gjithçka. Gjithmonë kur luan jashtë është pak më e vështirë, ka një faktor që të ndikon. Padyshim afrohet Botërori, për ne në fakt afrohet play-off. E dimë që është një hap shumë i vështirë, është një situatë shumë e mirë, nuk ka ndodhur kurrë më parë që ky ekip të shkojë në ndeshjet e fundit në gjendje të shkojmë në play-off të Botërorit. Tani duam ta shfrytëzojmë, nëse bëjmë një ndeshje të mirë ndaj Andorrës, mund të ndodhë”, shtoi Sylvinho.