Hanover 96 është përforcuar me talentin kuqezi Valdrin Mustafa, 21-vjeç, i cili luan me Shpresat kuqezi. I riu u transferua në Bundesligën gjermane, duke hedhur një hap të jashtëzakonshëm për karrierën e tij. Sulmuesi në 4 sezonet e fundit ka luajtur me ekipin e Kaizerslauternit. Te Hanover 96, më parë ka qenë pjesë edhe ish-kapiteni Altin Lala, i cili u shndërrua në legjendë.
“Pas 4 vjetësh në fanellën e ‘djajve të kuq’ vendosa të pranoj një sfidë të re. 4 vjet te Kaizerslautern më kanë formuar personalisht si një lojtar dhe si një person dhe kam pasur mundësi që të rritem më shumë.
Dua të falënderoj të gjithë tifozët, trajnerët, shokët dhe të gjithë ata me të cilët kam punuar. Faleminderit që më keni përkrahur dhe shoqëruar në këtë rrugë. Unë mezi po pres sfidën time të re me fanellën e Hanoverit dhe shpresoj shumë që ta kem sërish mbështetjen tuaj,” tha Mustafa pas nënshkirmit të kontratës.