Marjeta Karaj mohoi sot akuzën për urdhrin e dhënë prej saj ndaj të birit Besmir Karaj dhe mikut të tij Gazmend Ngota për t’i marrë jetën 61-vjeçarit Menduh Kurt-Deda në vitin 2017.
Por Gjykata e Tiranës duket se ka në dorë një përgjim që e ka “fundosur” 56-vjeçaren, borxhi prej 1 milionë lekësh ndaj së cilës u kthye në motiv për një vrasje makabre, pasi Kurt-Deda u dogj i gjallë në zonën pyjore të Malit të Dajtit, në Kodër-Shupal.
Në gjykatë avokati i Karajt ka pretenduar se Ngota është përdorues i narkotikëve dhe i pabesueshëm, por zbulimi i ngjarjes sipas A2 CNN ka ardhur për shkak të një përgjimi ku Marjeta Karaj kërcënon një tjetër person, që i detyrohet asaj një borxh.
“Të djeg, siç dogja Menduhun”, thotë 56-vjeçarja në përgjimin që zotëron Prokuroria dhe që është përdorur nga hetuesit për të zbardhur ngjarjen e rëndë.
Ngjarja ndodhi në vitin 2017, kur 56-vjeçarja së bashku me të birin, Besmir Karaj, 34 vjeç dhe shokun e tij Gazmir Ngota, 39 vjeç, e futën me forcë në makinë Menduh Kurt-Dedën dhe pasi e keqtrajtuan fizikisht e çuan në Kodër-Shupal ku e lidhën me litar dhe e dogjën për së gjalli.