Shumica e moderatorëve dhe gazetarëve më të njohur e kanë nisur karrierën në radio dhe jo më kot; thuhet se nëse ia del ne radio, mund t’ia dalësh kudo. Imagjinata e secilit prej nesh shtohet vazhdimisht duke përfytyruar se kush mund të fshihet pas këtij zëri që na përkëdhel veshin në radio.
“Të njoh nga zëri” ishte tema që u diskutua ditën e sotme në emisionin “Shqipëria Live” ku në lidhje “Skype” ishte gazetarja e njohur, Gerta Herta. Kjo e fundit është zëri i parë i Top Albania Radio që e hapi më 14 shkurt të vitit 1998.
Sot Gerta tregoi se ka pasur njerëz që e mendonin se ishte bionde vetëm nga zëri.
“Kishte njerëz që më mendonin për bionde. Në imagjinatën e tyre më kishin menduar ndryshe dhe u dola krejt ndryshe. Zëri është dhuratë nga Zoti, por nëse nuk do të kisha bërë trajnim për zërin nuk do të isha këtu ku jam. Këtu tingëlloj ndryshe e në mikrofonin e radios më ndryshe”, tha gazetarja.
Më pas ajo tha se është më komode në radio se sa në televizion.
“Në radio është më mirë. I ngre këmbët në tavolinë, nuk më shikon njeri. Pastaj unë nuk shquhem për ndonjë imazh të kuruar në jetën time të përditshme. Është më komode në radio”, përfundoi Herta.