Teuta është fituesja e Kupës së Shqipërisë duke e çuar kupën në Durrës. Teuta ka arritur të marrë trofeun pasi mposhti Tiranën 2-0 në stadiumin “Air Albania”. Të dyja ekipet kishin uri të madhe për ta fituar trofeun në 100-vjetorin e themelimit të skuadrave, por dominues ishin ‘djemtë e detit’.
Hoxha dhe Vila ishin ata që shuan ëndrrën e bardhebluve për të kurorëzuar një sezon perfekt me dopietë trofesh me Tiranën që ashtu si Teuta këtë vit mbush 100 vjeç.
Fillimi i kësaj finaleje ishte shokues për skuadrën kampione të vendit që e pa veten në disavantazh që në minutën e dytë me anë të Rustem Hoxhës pas një goditje këndi. Ishte ky një gol që i dha shumë zemër Teutës në minutat e para me skuadrën durrsake që iu afrua edhe golit të dytë me Emiliano Vilën. Gjithsesi Tirana përpiqet të reagojë dhe krijon rastet e saj me Torasën, por bardheblutë e kanë të vështirë të mposhtin portierin Stivi Frashëri dhe pjesa e parë u mbyll 1-0 për Teutën.
Në pjesën e dytë, Tirana regjistron shanse të tjera të shënimit të golit të barazimit, por ajo që e fjeti atë ishte përsëri Teuta. Lorenco Vila përfitoi nga një gafë e Kristi Vangjelit për të dërguar topin në portën e kampionëve të Shqipërisë dhe për të çuar në 2-0 rezultatin e ndeshjes që i mbylli praktikisht llogaritë e kësaj finaleje. Në fund Teuta ngriti trofeun e këtij kompeticioni që ishte i 4 për të dhe Tirana konfirmohet si ‘hajmalia’ e skuadrës bregdetare përsa i përket finaleve.