Këtë të enjte do të luhet dhe dueli i prapambetur mes Teutës dhe Partizanit në stadiumin ”Niko Dovana”. Dy ekipe tërësisht me objektiva të ndryshme këtë sezon, por që detyrim kanë vetëm fitoren.
Skuadra kryeqytetase, mbetet një nga pretendentet kryesore për titullin kampion dhe lufta në distancë për vendin e parë me Egnatian kryesuese vijon. Pavarësisht mungesave të shumta që të kuqtë kanë, ndaj durrsakëve detyra është të marrin maksimumin.
Listës së gjatë i është shtuar dhe Maget, që në derbi plotësoi numrin e kartonëve. Në konferencën e zakonshme për shtyp trajneri, Arbër Abilaliaj, tregoi se pavarësisht kundërshtarit, fokusi dhe detyra e ekipit të kuq mbetet e njëjtë, të marrin 3 pikë.
Djemtë e detit nuk po kalojnë një formë aspak të mirë dhe fitorja mungon prej më shumë se një muaji. Nën drejtimin e Edi Martinit, që ka treguar shpesh se mund të bëjë surpriza me këtë ekip, durrsakët do të luajnë gjithçka për gjithçka. Takimi nis në orën 17:00.