Anëtarja e Kryesisë së PD, Grida Duma është e bindur se opozita pas 6 vitesh e ka arritur qëllimin e saj. Imponimi që Bundestagu gjerman ka bërë përmes kushteve te vendosura për çeljen e negociatave. Për ish-deputeten janë sinjal i qartë se Edi Rama nuk mund të refuzojë më zgjidhjen e krizës politike.
“Nuk është më çështja a e pranon apo jo Rama këtë. Tashmë është e detyrueshme për të. Fakti që opozita shqiptare bëri të mundur që të ishte e detyrueshme dhe e imponuar nga Bundestagu gjerman për momentin historik në hapjen e negociatave, padyshim që është meritë e parë e opozitës shqiptare dhe Partisë Demokratike”, deklaron Duma.
Në një intervistë për ABC News, Duma thekson se PD mund të vijë në pushtet përmes një procesi të koordinuar dhe transparent brenda së djathtës.
“Në këto 6 vite është bërë mjaftueshëm, duke shkuar drejt qytetarit, duke bërë zgjedhje të brendshme, zgjedhje pas zgjedhjesh etj etj. Partia ka qenë gjithnjë në një modus zgjedhjesh dhe fushate. Padyshim moment i radhës kërkon: Qartësi! Qartësi! Qartësi! Një strategji e cila të koordinohet mirë, që nga terreni dhe deri në hierarkinë e lartë të Partisë Demokratike. Një koordinim i padiskutuar dhe transparent. Një koordinim nga platforma ekonomike e grupeve të punës, reformës zgjedhore, reformës në drejtësi dhe çdo element që prek politikbërjen”, thekson ish-deputetja e PD.
Rikthimin e ish-funksionarëve të lartë të PD nuk e sheh si problem, por kërkon që për hir të aksionit opozitar të ketë një përpjesëtim të drejte mes kontributit dhe vlerës që gjithsecili ka në parti.
“Një parti si Partia Demokratike padyshim ka nevojë për të gjitha kontributet. Por besoj se kontributi duhet të akomodohet bashkë me vlerën e vetë. Absolutisht do të theksoj gjithmonë se nuk e zëvendëson asgjë eksperiencën. Eksperienca në ekzekutiv, në qeverisje, në parti, në fushata zgjedhore, në terren. Nuk kemi luksin t’i humbim këto. Por duhet të kemi kujdes që eksperienca të kombinohet me kontributin dhe me atë që është dhënia dhe angazhimi në opozitë”, deklaron Duma.