Shqipëria nuk ka pse të shkojë në konfrontim, dhe palët ti thërrasin mendjes e secili të mbajë përgjegjësitë e tij. Kështu deklaroi kreu i shtetit Ilir Meta këtë mëngjes pas një aktiviteti ku mori pjesë.
“Mendoj që kjo situatë nuk duhet të ekzistonte kurrsesi pas 22 vjetësh, që kur Shqipëria u nda me vitin 1997, që ishte një vit mjaft fatkeq. Të gjithë t’i thërrasin mendjes dhe të marrin përgjegjësitë e tyre, sepse për interesa tërësisht egoiste dhe okulte, Shqipëria nuk ka pse të shkojë në konfrontim dhe as shqiptarët me njëri-tjetrin. Ata kanë vendosur të bashkëjetojnë në mënyrë demokratike dhe janë ndarë me sistemet përjashtuese që në vitin 1990”, tha Meta.
I pyetur për një tryezë nga Presidenti, ai tha se askush nuk mund të transferojë përgjegjësi te të tjerët, e aq më tepër te Presidenti i Republikës. “Ata e dinë vetë shumë mirë se çfarë duhet të bëjnë dhe të jenë të vetëdijshëm për pasojat që do të kenë”, u shpreh Meta.