Drejtori i Policisë Kriminale Tonin Vocaj, ak drejtuar gishtin drejt Krujës dhe tha se ky rreth ka tendenca të ketë mbjellje dhe kultivim më të shumtë të kanabisit se sa pjesa tjetër e Shqipërisë.
Vocaj, i ftuar në studion e “Opinion”, tha se në këto zona, pavarësisht se pastrohet nga policia, ekziston mundësia për rimbjellje.
“Sot në territorin e Shqipërisë ka shumë më pak lëndë narkotike se ç’ka pasur më herët. Nëse do të analizojmë vetëm sekuestrimet që janë bërë, mund të shohim shumë herë krahasimin. Nëse dikush ka informacione se policët po bëjnë kompromise, të ballafaqohen me fakte, të ngrihen denoncime. Ka një tendencë për kultivim të bimëve narkotike, më të shtuar janë në Krujë. Aty ekziston edhe mundësia e rimbjelljes. Policia shkon e zhduk dhe mbillet sërish. Ne të gjithë atë zonë e kemi pastruar. Në zonën e Bovillës, Krujës dhe në këto zona periferike, ekziston dhe mundësia e rimbjelljes. Edhe rritja e çmimit, tregon që hashashi ka prodhim më të pakët,”- tha Vocaj.