Një ngjarje tragjike ka tronditur këtë të martë fshatin Domen, në njësinë administrative Postribë të Shkodrës, ku një 24-vjeçare dhe dy fëmijët e saj të mitur, vetëm 1 dhe 3 vjeç, humbën jetën pasi banesa ku ndodheshin u përfshi nga flakët.
Sipas Policisë, zjarri ka rënë rreth orës 13:10, në momentin kur në banesë ndodheshin vetëm nëna me dy fëmijët. Pavarësisht ndërhyrjes së shërbimeve të emergjencës, asnjëri prej tyre nuk mundi të shpëtonte.
Nga hetimet paraprake dyshohet se zjarri mund të jetë shkaktuar nga shpërthimi i një bombole gazi që ndodhej në banesën e vjetër të familjes Çela. Në vendngjarje është gjetur edhe një shishe me benzinë, ndërsa grupi hetimor po punon për të sqaruar shkakun e saktë të ngjarjes.
Familja Çela jetonte prej vitesh në Gjermani dhe kishte ardhur në Shqipëri për pushime. Ata kishin shkuar gjatë ditës në banesën e vjetër familjare në fshatin Domen, me qëllim kryerjen e disa riparimeve dhe punimeve, kur ndodhi tragjedia.
Autoritetet vijojnë hetimet për të zbardhur plotësisht rrethanat e kësaj ngjarjeje të rëndë.