Gjergji Kapaj, 43-vjeçari shqiptar që u vu sot në pranga si ‘koka e unazës’ së trafikut të drogës rezulton të jetë një person me precedent të mëparshëm penalë dhe një emër mjaft i rrezikshëm për policinë greke. Në vitin 2017, Kapaj ishte mjaft me fat pasi i shpëtoi një atentati në një lokal në Glifadha të Athinës, ngjarje ku mbeti i vrarë biznesmeni shqiptar, Roland Shembitrasi.
Ngjarja ndodhi në tetor të vitit 2017, në një nga lokalet më të njohur të Athinës që ishte në pronësi të Shembitrasit. Kapaj mbeti i plagosur, por pak ditë më vonë ai la spitalin për të vijuar jetën e tij normale, ndërsa miku i tij, u përcoll për në banesën e fundit.
Për këtë ngjarje u vu në pranga një shqiptar, i identifikuar si Ralf Feruku dhe i njohur si “Taqi Shqiptari”. Ky i fundit u kap teksa udhëtonte me një mjet luksoz drejt Greqisë bashkë me të njohurin Alket Rizai dhe një tjetër shtetas grek. Por, tre muaj më vonë ai u lirua për mungesë provash që mund ta lidhinin me masakrën e ndodhur në “Joy Bar”.
Shëmbitrasit iu sekuestrua edhe 1 milion euro pasuri nga Policia shqiptare, pasi dyshohej si e ngritur me paratë e trafikut të lëndeve narkotike në Greqi. Tashmë vrasja e tij dhe plagosja e Kapajt janë ende pa autor.