Kryeministri Edi Rama thotë se djegia e mandateve është një akt që nuk ka ndodhur kurrë në demokracinë parlamentare. Me t-shirt dhe xhaketë sportive në një intervistë për Rai News 24, Rama thotë se populli preznatohet përmes të zgjedhurve të tij.
“Është një akt që nuk është bërë kurrë në një demokraci parlamentare ku populli prezantohet përmes të zgjedhurve të tij që duhet t’i përgjigjen popullit”, tha Rama.
Por Rama i dha të drejtë protestës së studentëve, të cilën e quajti protestë të popullit, ndryshe nga ajo e opozitës.
“Protesta e studentëve ishte një protestë e popullit. Ishin të gjitha kërkesat e arsyeshme dhe ne i dëgjuam. Kishin të drejtë të protestonin, ata janë të dëshpëruar”.
Sa i takon zgjedhjeve të përgjithshme, Rama tha: “Janë të dëshpëruar për faktin që nuk fitojnë. Zgjedhjet po vijnë, ne kemi mazhorancën, jemi para me të gjitha sondazhet në mënyrë ekzemplare. Nuk mund të thuhet: unë bëj kamikazin nëse s’me jepni atë që dua”, u shpreh Rama.