Liga e Kampionëve ka sjellë sot një takim mjaft të fortë dhe delikat, i konsideruar si finale e parakohshme duke qenë se Liverpuli dhe Bajerni i Mynihut kanë provuar forcën e tyre në takimin e parë të vlefshëm për ‘Play Off’. Pas rasteve të shumta nga të dyja skuadrat, fitues mund të konsiderohen vetëm portierët të cilët kanë qenë shpesh herë vendimtarë me ndërhyrjet e tyre.
Në pjesën e parë, të dyja skuadrat e kanë kërkuar me ngulm golin dhe kanë pasur raste ideale për të shënuar por kanë qenë Nojer dhe Alison ato që kanë mbajtur portat e paprekura, me këtë të fundit që vetëm pak centimetra larg topit, ka evituar një autogol të sigurt në pjesën e parë.
Ashtu si e para, edhe e dyta ka nisur me ritëm por ka qenë Liverpuli më kërkues i golit duke qenë se ishte ekipi pritës dhe në Mynih e pret një transfertë e vështirë. Pak minuta para fundit, Mane u duk se po zhbllokonte shifrat, por Nojer ka ndalur. Me këtë barazim, vazhdon tabuja ‘Anfield’ për klubet gjermane duke qenë se Liverpuli nuk ka humbur kurrë në shtëpi ndaj një klubi gjerman.