Qeveria në mbledhjen e të mërkurës ka miratuar edhe disa ndryshime për vendimin nr.867, datë 10.12.2014, “Për procedurat e bashkëpunimit në institucionet e administratës shtetërore.
Më parë në këtë vendim thjesht përcaktohet se çdo institucion i administrates shtetërore ka të drejtë që, nëpërmjet kësaj procedure, të kërkojë nga institucionet e tjera të administratës shtetërore që t’i sigurohen të dhëna,informacione apo çdo lloj ndihme tjetër, të cilat janë të nevojshme për realizimin e detyrave funksionale të tij. Por kjo tashmë do të funksionojë përmes rrjeteve profesionale që do të krijohen në administratë.
Kjo është përcaktuar me shtesën në pikën 1 të kreut të II të këtij vendimi që parashikon krijimin e rrjeteve profesionale ndërinstitucionale të nëpunësve për fusha të caktuara, të cilat kontribuojnë në rritjen e nivelit të bashkëpunimit dhe komunikimit. Qëllimi I krijimit të kësaj pike sipas vendimit të një dite më parë të qeverisë është shkëmbimi i eksperiencave më të mira, njohurive dhe praktikave për procese pune të ngjashme, shkëmbimit/krahasimit të informacionit apo të të dhënave në fushën përkatëse, diskutimit të çështjeve apo problematikave si dhe adresimit të kërkesave pranë institucioneve përgjegjëse për të bërë rregullime të posaçme nëpërmjet akteve rregullatore që mbulojnë fushën përkatëse.
Në vendim është parashikuar edhe se si do të funksionojnë këto rrjete profesionale. Ato krijohen për të trajtuar çështje, të cilat lidhen me qëllimin e ekzistencës dhe/ose fushën e përgjegjësisë së institucionit që i krijon. Në to marrin pjesë nëpunës/punonjës të institucioneve të administratës shtetërore, të cilët janë të punësuar në njësitë organizative të ngarkuara me ekzekutimin e detyrave që lidhen me fushën për të cilën krijohet rrjeti dhe kanë njohuri e aftësi më të mira në këtë fushë.
Rrjetet profesionale ndërinstitucionale të nëpunësve ngrihen me urdhër të Kryeministrit, ministrit përkatës apo titullarit të institucionit, që ka në fushë përgjegjësie fushën për të cilën ngrihet rrjeti. Në urdhrin e ngritjes së rrjetit përcaktohen qëllimi, synimet e përfitimet, struktura udhëheqëse, struktura të tjera në përbërje të tij, nëse është rasti, anëtarët, detyrat e përgjegjësitë, mënyra e organizimit e funksionimit të tij dhe numri maksimal i anëtarëve. Si rregull, në përbërje të rrjetit nuk mund të ketë më shumë se 30 anëtarë.
Struktura udhëheqëse e rrjetit profesional ndërinstitucional të nëpunësve është institucioni që ka kompetencat më të larta sa i takon fushës në të cilën ngrihet rrjeti.