Dështimi me Superligën i Milanit është shoqëruar sot me një dështim edhe në fushën e lojës, ku kuqezinjtë e Piolit janë mundur në mënyrë të papritur me përmbysje në minutat e fundit nga Sasuolo. Një humbje që peshon shumë në luftën për pjesëmarrjen në Ligën e Kampioneve në sezonin e ardhshëm, pasi kuqezinjtë mund të kalohen shumë shpejt nga Atalanta e të kenë më afër shumë rivalë të tjerë direkt.
Milani i rezistoi sulmeve të Sasuolos në fillim dhe pak nga pak rriti ritmin e lojës, duke gjetur golin e avantazhit me anë të Çalhanollu, i cili mposhti Konsiljin me një goditje të harkuar në mënyrë perfekte. Më pas, kuqezinjtë shpërdoruan raste dhe u munduan të përgjumnin ndeshjen për ta mbyllur me këtë sukses minimal.
Por De Zerbi gjeti zëvendësimin e duhur duke aktivuar Raspadorin dhe pikërisht sulmuesi i ri u bë heroi i Sasuolos, duke shënuar në minutat 77 dhe 84 për të përmbysur rezultatin e sfidës. Milani u mundua të reagonte, por ishte shumë vonë për të bërë diçka në minutat e mbetura dhe u desh të dorëzohej përballë një humbje që i rrezikon vendin e dytë në klasifikimin e Serisë A.